Martesa, divorci, mbiemri

Mund të martohen dy persona që janë të paktën 18 vjeç dhe të aftë për gjykim. I aftë për gjykim do të thotë: e kupton çfarë bën. Ata nuk duhet të jenë tashmë të martuar. Ata gjithashtu nuk duhet të jenë të afërm të ngushtë, pra jo prind dhe fëmijë ose vëllezër e motra. Që nga viti 2022 mund të martohen edhe dy gra ose dy burra. Të ardhurat, vendbanimi ose pëlqimi i prindërve nuk luajnë asnjë rol.

Para martesës, çifti paraqet së bashku kërkesën për martesë në zyrën e gjendjes civile. Zyra kontrollon kushtet. Kjo quhet procedurë përgatitore. Pas kësaj bëhet kurorëzimi civil. Kurorëzimi në kishë është vullnetar dhe mund të bëhet vetëm pas kurorëzimit civil. Zakonisht kurorëzimi bëhet në sallën e kurorëzimeve të zyrës së gjendjes civile.

Për mbiemrin vlen ky rregull: secili person mund ta mbajë mbiemrin e vet. Ose çifti zgjedh njërin nga mbiemrat para martesës si mbiemër të përbashkët të familjes. Nëse nuk kanë mbiemër të përbashkët, prindërit vendosin në momentin e martesës cilin mbiemër do të marrin fëmijët. Divorcin mund ta kërkojë gruaja, burri ose të dy së bashku.