Banesat mbi hunj dhe Turicum

Që para më shumë se 6000 vjetësh jetonin njerëz buzë Liqenit të Cyrihut. Afërsisht nga viti 5000 deri në vitin 1000 para Krishtit, ata ndërtuan banesa mbi hunj. Këto janë shtëpi mbi shtylla druri, të quajtura hunj, në brigjet e liqeneve dhe të lumenjve. Kështu njerëzit ishin të mbrojtur nga përmbytjet dhe nga kafshët. Mbetje të këtyre shtëpive ndodhen edhe sot në ujë. Ato bëjnë pjesë në Trashëgiminë Botërore të UNESCO-s.

Më vonë erdhën romakët. Vendin ku lumi del nga liqeni ata e quajtën Turicum. Prej këtij emri rrjedh emri Zürich (Cyrih). Romakët sollën, ndër të tjera, kulturën e banjave dhe gjuhën e tyre. Ata ndërtuan banja publike (terma). Mbetjet e një banje romake mund t'i shohësh në qytetin e vjetër të Cyrihut, në rrugën Thermengasse. Emra të tjerë romakë u përkasin vendeve të tjera: Vitudurum është Winterthur, Vindonissa është Windisch, Aquae Helveticae është Baden.

Si ta mbash mend: TuRIcum, ZüRIch, ZuRIgo: emri italian Zurigo e kujton ende Turicum.